"இதயம் பலவீனமானவர்கள், முதியவர்கள், குழந்தை மற்றும் பிரக்னன்ட் லேடீஸ் தயவு செய்து இந்த மேட்ச்ச பாக்காதீங்க" என்ற பொறுப்புத்துறுப்போடு, ஹைதராபாத் சன்ரைசர்ஸ் அணியும், பெங்களூரு ராயல் சேலஞ்சர்ஸ் அணியும் ஹைதராபாத்தில் மோதின. பெங்களூரு அணிக்கு இது 250வது ஐ.பி.எல் போட்டி என்பதால் பெங்களூரு அணி ரசிகர்களும், "ஹைதராபாத் 250 ரன்ன 10 ஓவர்ல அடிப்பாங்களா இல்ல 11 ஓவர்ல அடிப்பாங்களா?" எனக் குழப்பம் இருப்பதால் சென்னை, மும்பை அணி ரசிகர்களும் இப்போட்டிக்காகக் காத்திருந்தனர்.
டாஸ் வென்ற பெங்களூரு அணி உஷாராக பேட்டிங்கைத் தேர்வு செய்தது. "பந்துவீச்சாளர்கள் எல்லாம் பழநிக்கு பாதயாத்திரைப் போய்ட்டாங்க. அதனால 11 பேரும் பேட்ஸ்மேன்ஸ்தான்" என்ற அலறவிடும் அறிவிப்போடு பெங்களூரு அணி களமிறங்கும் என்று எதிர்பார்க்கப்பட்ட நிலையில், அணியில் எந்த மாற்றமும் செய்யாமல் களமிறங்கியது. ஹைதராபாத் அணியில் வேகபந்து வீச்சாளர் உனத்கட் சேர்க்கப்பட்டிருந்தார்.
விராட் கோலியும், டு ப்ளெஸ்ஸியும் பெங்களூருவுக்குத் தொடக்கம் கொடுத்தனர். அபிஷேக் சர்மா வீசிய முதல் ஓவரின் முதல் பாலை பவுண்ட்ரிக்கு அனுப்பினார் கோலி. அந்த ஓவரில் 10 ரன்கள் கிடைத்தன. புவனேஷ்வர் குமாரின் இரண்டாவது ஓவரில் 3 பவுண்ட்ரிகள் உட்பட 14 ரன்கள் குவித்து, 'லேசான தடியடியுடன்' அதிரடிக்கு மாறியது பெங்களூரு. கேப்டன் கம்மின்ஸ் வீசிய 3வது ஓவரை அடுத்தடுத்து பவுண்டரிகள் என கோலி கொளுத்திப் போட, டு ப்ளெஸ்ஸியும் தன் பங்கிற்கு ஒரு சிக்ஸை விலாச, மொத்தம் 19 ரன்கள் கிடைத்தன. கமான் வேலு!
நடராஜனுக்கு பவுண்டரியால் வணக்கம் வைத்தார் கோலி. ஆனால், நடராஜனின் 5வது பந்தில் பெரிய ஷாட்டிற்கு முயற்சி செய்து, மார்க்ரமிடம் கேட்ச் ஆகி வெளியேறினார் கேப்டன் டு ப்ளெஸ்ஸி. ஆனாலும், 4 ஓவர்களுக்கு 50 ரன்கள் என நல்ல நிலையிலேயே இருந்தது பெங்களூரு. கோலியும், ஜேக்ஸும் களத்தில் இருக்க, 5வது ஓவரில் ஷாபாஸின் சுழலைக் கொண்டு வந்தார் கம்மின்ஸ். அதற்குப் பலனாக வெறும் 2 ரன்கள் மட்டுமே கிடைத்தன. பவர்ப்ளேயின் கடைசி ஓவர் மீண்டும் நடராஜனின் கைகளுக்குச் செல்ல, கோலியின் சிக்ஸ் உட்பட 9 ரன்கள் பெங்களூருவுக்குக் கிடைத்தன.
7வது ஓவரில் ஜேக்ஸின் ஸ்டெம்புகளைத் தூக்கியது மார்க்கண்டேவின் சுழல். பெங்களூருவுக்குச் சுமாராக அமைந்த அந்த ஓவரில் 4 ரன்கள் மட்டுமே கிடைத்தன. ஷாபாஸின் 8வது ஓவரில் 8 ரன்கள் கிடைத்தன. 8 ஓவர்களுக்கு 73 ரன்களை எடுத்து, '200+ டார்கெட்' என்ற டாக்கெட்டை நோக்கி எழுந்து நிற்கத் தொடங்கியது பெங்களூரு. மார்க்கண்டேவின் 9வது ஓவரின் முதல் பந்தை பட்டிதர் சிக்ஸருக்கு விரட்ட, கோலி - பட்டிதர் கூட்டணி மீது நம்பிக்கை வந்தது. உனத்கட்டின் 10வது ஓவரில் 10 ரன்கள். மார்க்கண்டேவின் 11வது ஓவரில் 6, 6, 6, 6 என பட்டிதர் விஸ்வரூபம் எடுக்க, அந்த ஓவரில் 27 ரன்கள் கிடைத்தன. 15 பந்துகளில் 46 ரன்கள் குவித்திருந்தார் பட்டிதார். 27 பந்துகளில் 58 ரன்கள் பார்ட்னர்ஷிப்.
"இது சரிபட்டு வராது" என 12வது ஓவரில் கேப்டன் கம்மின்ஸே வந்தார். அந்த ஓவரில் 6 சிங்கிள்ஸ் மட்டுமே கிடைத்தன. உனத்கட்டின் 13வது ஓவரில், 19 பந்துகளில் அரை சதம் கடந்த கையோடு, லோ ஃபுல்டாஸில் கேட்ச் ஆகி வெளியேறினார் பட்டிதர். ஷாபாஸின் சுழலில் 14வது ஓவரில் 4 ரன்கள் மட்டுமே கிடைத்தன. மறுபுறம் 37 பந்துகளில் அரை சதம் கடந்திருந்தார் கோலி. பட்டிதர் செட் செய்த ரன்ரேட்டை அப்படியே எடுத்துச் செல்ல முடியாமல் திணறிய கோலி, 15வது ஓவரில் உனத்கட் பந்தில் அவுட் ஆனார். அந்த ஓவரில் 6 ரன்கள் மட்டுமே கிடைத்தன. பவுண்ட்ரிகள் இல்லாமல் தத்தளித்துக்கொண்டிருந்தது பெங்களூரு. ரன் ரேட்டும் மளமளவெனச் சரிய, 15 ஓவர்களில் 142 ரன்கள் எடுத்திருந்தது. வலுவான டார்க்கெட்டை நிர்ணயிக்க வேண்டிய பொறுப்பு, கிரீன் - லாம்ரோர் கைகளுக்கு வந்தது. கம்மின்ஸின் 16வது ஓவரில் கிரீனின் பவுண்டரிகளால் 15 ரன்கள் கிடைக்க, மீண்டும் பெங்களூரு பக்கம் காற்றடிக்கத் தொடங்கியது. ஆனா, இந்தக் காத்து பத்தாதே ப்ரோ என்றனர் பெங்களூரு பௌலர்கள்!
17வது ஓவரில் லாம்ரோரை வெளியேற்றி, தனது மூன்றாவது விக்கெட்டை எடுத்தார் உனத்கட். ஆனாலும், "தூதுவன் வருவான் மாரி பொழியும்" எனக் காத்திருந்த பெங்களூரு ரசிகர்களின் இதயங்களை நனைக்கக் களமிறங்கினார் தினேஷ் கார்த்திக். நடராஜன் வீசிய 18வது ஓவரில் 12 ரன்கள் கிடைத்தன. கம்மின்ஸின் 19வது ஓவரை அடுத்தடுத்து பவுண்ட்ரிகள் ஆக்கியது கிரீன் - கார்த்திக் கூட்டணி. 200 ரன்களை நெருங்கிக்கொண்டிருந்தது பெங்களூரு. ஆனால், அதே ஓவரில் ஸ்லோ பவுன்சரைத் தூக்கி அடித்த தினேஷ் கார்த்திக் கேட்ச் ஆகி வெளியேறினார். அந்த ஓவரில் 15 ரன்கள் கிடைத்தன. 'இம்பேக்ட் ப்ளேயராக' ஸ்வப்னில் சிங் களமிறங்கி, நடராஜன் வீசிய கடைசி ஓவரை 6, 4 எனத் தொடங்கி, பெங்களூரை 200 ரன்களைத் தாண்ட வைத்தார். ஆனால், கடைசி பந்தில் கேட்ச் ஆகி வெளியேறினார். அந்த ஓவரில் 12 ரன்கள் கிடைக்க, மொத்தம் 20 ஓவர்கள் முடிவில் 206 ரன்கள் எடுத்திருந்தது பெங்களூரு.
தனது 100வது ஐ.பி.எல் போட்டியில், மூன்று முக்கிய விக்கெட்களை வீழ்த்தினார் உனத்கட். கேமரூன் கிரீன், பட்டிதர் ஆகியோர் ஃபார்முக்கு வந்தது, பெங்களூரு அணிக்கு நம்பிக்கை தந்தது. "யானை பசிக்கு சோளப்பொரியா?" என ஹைதராபாத் ரசிகர்களின் கோபமான கேள்வியை உணர முடிந்தது. மறுபுறம், "பாஸ் இந்த டார்கெட்ட வச்சு 10 ஓவருக்குதான் பந்து போட முடியும்" என பெங்களூரு பௌலர்களின் மைண்ட் வாய்ஸையும் கேட்க முடிந்தது.
"பந்தை அடிச்சு ஓட விடுவோமா? இல்ல ஓட விட்டு ஆடிப்போமா?" எனத் தீவிரமாக டிஸ்கஸ் செய்தபடி ஹைதராபாத் அணிக்கு ஹெட்டும், அபிஷேக் சர்மாவும் களமிறங்கினார்கள். ஜேக்ஸின் முதல் ஓவரில் ஹெட், கரண் கைகளில் கேட்ச் ஆகி வெளியேறினார். ஹே எப்புட்ர்ரா! சிராஜ் வீசிய 2வது ஓவரில் 8 ரன்கள் மட்டுமே கிடைத்தன. ஜேக்ஸ் சுழற்றிய 3வது ஓவரில் இரண்டு சிக்ஸ், ஒரு ஃபோர் என்று எடுத்தார் அபிஷேக். அந்த ஓவரில் 20 ரன்களைக் குவித்தது ஹைதராபாத். யஷ் தயால் வீசிய 4வது ஓவரில் லென்த்தாக வீசிய பந்தை அடிக்க முயன்று, தினேஷ் கார்த்திக்கிடம் கேட்ச் ஆகினார் அபிஷேக். இரண்டு அதிரடிக்காரர்களையும் வெளியேற்றி, போட்டியை ஓரளவிற்கு தன் பக்கம் இழுத்துக்கொண்டது பெங்களூரு.
ஸ்வப்னில் வீசிய 5வது ஓவரில் மார்க்ரம் 'எல்பிடபுள்யூ' முறையில் அவுட் ஆக, 41 ரன்களுக்கு 3 விக்கெட்களை இழந்தது ஹைதராபாத். நிதிஷ் - 'கடப்பாரை' கிளாஸன் கூட்டணி களத்திலிருந்தது. ஸ்வப்னிலின் ஓவரில் 5 பந்துகளில் 19 ரன்கள் கிடைக்க, 6வது பந்தை சிக்ஸருக்குப் பறக்க விட முயன்றபோது டாப் எட்ஜ் ஆகி கேட்ச் ஆனார் க்ளாஸன். 56 ரன்களுக்கு 4 விக்கெட்கள். 'எப்டி இப்டியெல்லாம் அப்டி' என பெங்களூரு ரசிகர்களே பதறிப் போனார்கள். சிராஜின் ஓவரில் 6 ரன்கள், ஸ்வப்னில் வீசிய 7வது ஓவரில் சொற்ப ரன்கள் மட்டுமே கிடைக்க, பெங்களூருவின் கைகள் ஓங்கத் தொடங்கின.
கரண் வீசிய 8வது ஓவரில் ஸ்விட்ச் ஹிட்டிற்கு முயன்று போல்டு ஆனார் நிதிஷ். ஹைதராபாத் 5 விக்கெட்களை இழந்தது. ஹைதராபாத் அணியை ஸ்லிப், சில்லி பாயின்ட் எல்லாம் வைத்து வம்பிழுத்தது பெங்களூரு அணி. குசும்பதான்யா உங்களுக்கு! ஃபெர்குசன் வீசிய 9வது ஓவரை சிக்ஸுடன் தொடங்கினார் சுமத். ஒரு சிக்ஸ், ஒரு பவுண்ட்ரி உட்பட அந்த ஓவரில் 13 ரன்கள் கிடைத்தன. கரண் வீசிய 10வது ஓவரின் முதல் பந்தில் அவரிடமே கேட்ச் ஆனார் சமத். 10 ஓவர்கள் முடிவில் 89 ரன்களுக்கு 6 விக்கெட்களை இழந்து, கேப்டன் கம்மின்ஸ் - ஷாபாஸ் கூட்டணியை நம்பியிருந்தது ஹைதராபாத்.
ஸ்வப்னில் சுழற்றிய 11வது ஓவரில் கம்மின்ஸின் இரண்டு சிக்ஸ்கள் உட்பட 15 ரன்களைச் சேர்த்தது ஹைதராபாத். 54 பந்துகளில் 103 ரன்கள் தேவை என்ற எட்டக்கூடிய இலக்கை வைத்திருந்தது ஹைதராபாத். ஆனால் விக்கெட்தான் இல்லை! கரணின் 12வது ஓவரில் 4, 6 என 15 ரன்கள் வந்தன. 10 பந்துகளில் 29 ரன்கள் குவித்த கம்மின்ஸ், தனது கேப்டன் இன்னிங்க்ஸைத் தொடர்ந்தார். யஷ் தயாள் வீசிய 13வது ஓவரில் 4 ரன்கள் மட்டுமே கிடைத்தன. ஒரு ஓவர் பெங்களூரு பக்கம், அடுத்த ஓவர் ஹைதராபாத் பக்கம் என வெற்றியானது அணி மாறிக்கொண்டே இருந்தது. கேமரூன் கிரீன் வீசிய 14வது ஓவரில் கம்மின்ஸும் கேட்ச் ஆகி வெளியேற, ஹைதராபாத்தின் வெற்றி கிட்டத்தட்ட தகர்ந்தது. நடப்பு ஐ.பி.எல் தொடரில் முதன்முதலாக எதிரணியின் 7வது விக்கெட்டை வீழ்த்தியது பெங்களூரு அணி. அந்த ஓவரில் 3 ரன்கள் மட்டுமே கிடைத்தன.
15வது ஓவரை கரண் வீச, 6 ரன்கள் மட்டுமே கிடைக்க, அடுத்த 30 பந்துகளில் 75 ரன்கள் என்ற கடின இலக்கு ஹைதராபாத்தின் கண் முன்னால் வந்து நின்றது. கிரீன் வீசிய 16வது ஓவரில் அடுத்தடுத்த ஃபோர்களால் சிறிது நம்பிக்கை கொடுத்தாலும், அடுத்த பாலே சிராஜிடம் கேட்ச் ஆனார் புவனேஷ்வர் குமார். 8 விக்கெட் விழுந்து ஹைதராபாத் தள்ளாட, முழு பொறுப்பும் ஷாபாஸ் மீது விழுந்தது. 4 ஓவருக்கு 66 ரன்கள் தேவை. 17வது ஓவரில் 3 ரன்கள் கிடைத்தன. ஃபெர்குசன் வீசிய 18வது ஓவரில் ஷாபாஸின் சிறிய அதிரடியால் 15 ரன்கள் கிடைத்தன. 2 ஓவருக்கு 48 ரன்கள் தேவை. சிராஜ் வீசிய 19வது ஓவரில் 4 ரன்கள் மட்டுமே கிடைக்க, கடைசி ஓவரில் 44 ரன்கள் தேவைப்பட்டன.
யஷ் தயாள் வீசிய கடைசி ஓவரில் 8 ரன்கள் மட்டுமே கிடைத்தன. 20 ஓவர்கள் முடிவில் 171 ரன்கள் எடுத்து, 8 விக்கெட்களை இழந்திருந்தது ஹைதராபாத். பெங்களூரு அணி 35 ரன்கள் வித்தியாசத்தில் வெற்றிபெற்றது. சாதிக்கப் பிறந்த சக்கரபாணியான ஹைதராபாத்தைச் சோதிக்கப் பிறந்த சக்திவேல் உண்மையிலேயே பெங்களூருதான் என்பது நிரூபணமானது. கடைசியாக மார்க் 25-ம் தேதி தனது முதல் வெற்றியைப் பெற்றிருந்த பெங்களூரு அணி, ஒரு மாதம் கழித்து தனது இரண்டாவது வெற்றியைப் பெற்றிருக்கிறது. நடப்பு ஐ.பி.எல்லில் இரண்டு ஜெர்ஸி, இரண்டு வெற்றி என சமன் செய்துகொண்டது பெங்களூரு.
"சம்முவம் கால்குலேட்டரை எடுறா..." என ஆர்.சி.பி ரசிகர்கள் கிளம்பியிருக்கக் கூடும்!
from Vikatan Latest news https://ift.tt/F8RCtcy
0 Comments