வெஸ்ட் இண்டீஸுக்கு எதிரான முதல் ஒருநாள் போட்டியில், 15,000 ODI ரன்கள் என்ற பிரமாண்ட மைல்கல்லை கடந்ததுடன், சதம் விளாசி ஆட்டத்தையும் இந்தியாவின் வசமாக்கியிருக்கிறார் கோலி. ஒரு பக்கம் அவரது வரலாற்றுச் சாதனை; மறுபக்கம் 8 விக்கெட்டுகள் வித்தியாசத்தில் இந்தியாவின் வெற்றி என, திருவனந்தபுரம் மைதானத்தில் ரசிகர்களுக்கு ஒரே போட்டியில் இரண்டு மாஸ் சம்பவங்கள் அரங்கேறியிருக்கின்றன.
வெஸ்ட் இண்டீஸ் அணிக்கு எதிரான முதல் ஒருநாள் போட்டியில் முதலில் பேட் செய்த வெஸ்ட் இண்டீஸ் அணி, நிர்ணயிக்கப்பட்ட 50 ஓவர்களில் 7 விக்கெட் இழப்புக்கு 295 ரன்கள் எடுத்தது. அந்த அணியின் ஜஸ்டின் கிரீவ்ஸ் 101 ரன்களும், ஜான் கேம்ப்பெல் 62 ரன்களும் எடுத்தனர். இந்திய அணியில் குல்தீப் யாதவ் 4 விக்கெட்டுகளை வீழ்த்தினார்.
296 ரன்கள் என்ற இலக்குடன் களமிறங்கிய இந்திய அணிக்கு ரோகித் சர்மா – ஷுப்மன் கில் ஜோடி 74 ரன்கள் சேர்த்து நல்ல தொடக்கம் அமைத்துக் கொடுத்தது. ரோகித் சர்மா 32 ரன்களில் ஆட்டமிழந்த பிறகு, ஷுப்மன் கில் – விராட் கோலி கூட்டணி ஆட்டத்தை இந்தியாவின் கட்டுப்பாட்டுக்குள் கொண்டு வந்தது.
இந்த இன்னிங்ஸில் கோலி 15,000 ODI ரன்களை கடந்தார். இதன்மூலம் ஒருநாள் கிரிக்கெட்டில் இந்த மைல்கல்லை எட்டிய இரண்டாவது வீரர் என்ற பெருமையைப் பெற்றார். முதலிடத்தில் சச்சின் டெண்டுல்கர் உள்ளார். ஆனால் சச்சினுக்கு இந்த எண்ணிக்கையை எட்ட 377 இன்னிங்ஸ்கள் தேவைப்பட்ட நிலையில், கோலி அதை வெறும் 303 இன்னிங்ஸ்களில் எட்டி, 15,000 ரன்களை அதிவேகமாக கடந்த வீரர் என்ற சாதனையையும் படைத்தார்.
அதோடு நின்றுவிடவில்லை. அதிரடியாக விளையாடிய கோலி 88 பந்துகளில் ஆட்டமிழக்காமல் 139 ரன்கள் விளாசினார். ஷுப்மன் கில் 108 பந்துகளில் 110 ரன்கள் எடுத்தார்.
இறுதியில் இந்திய அணி 41.4 ஓவர்களில் 2 விக்கெட் இழப்புக்கு 300 ரன்கள் எடுத்து, வெஸ்ட் இண்டீஸ் அணியை 8 விக்கெட்டுகள் வித்தியாசத்தில் வீழ்த்தியது. இதன்மூலம் 3 போட்டிகள் கொண்ட தொடரில் இந்தியா 1-0 என முன்னிலை பெற்றுள்ளது.
from Vikatan Latest news https://ift.tt/DQI8BLe
0 Comments