Doctor Vikatan: எனக்கு வயது 45. கடந்த 3 வருடங்களாக சர்க்கரைநோய் இருக்கிறது. கடைகளில் விற்கும் சுகர்-ஃப்ரீ (Sugar-free) பிஸ்கட் மற்றும் ஸ்வீட்டுகளை சர்க்கரை நோயாளிகள் தாராளமாகச் சாப்பிடலாமா...?
பதில் சொல்கிறார், சென்னையைச் சேர்ந்த பொது மருத்துவர் அருணாசலம்
நீரிழிவு பாதித்தவர்கள், சர்க்கரை இல்லாத (Sugar-free) அல்லது டயட் பிஸ்கட்டுகளைச் சாப்பிடலாம். ஆனால், அவற்றை அளவோடு வைத்துக்கொள்வது அவசியம்.
அதாவது உணவு இடைவேளைகளுக்கு நடுவில் ஏற்படும் பசிக்கு, இரண்டு முதல் அதிகபட்சம் நான்கு பிஸ்கட்டுகள் வரை மட்டுமே சாப்பிட வேண்டும். அதையே உணவாக நினைத்து நிறைய சாப்பிடக் கூடாது. டயட் பிஸ்கட்டுகள் என்றாலும் முழு உணவுக்கு மாற்றாகச் சாப்பிடக் கூடாது. சுகர்ஃப்ரீ பிஸ்கட் சாப்பிடும்போது அதனுடன் காய்கறி சாலட் (Vegetable Salad) சேர்த்துச் சாப்பிடுவது உடல் நலத்திற்கு நல்லது.
இனிப்புகளைப் பொறுத்தவரை ஸ்டீவியா (Stevia) போன்ற மாற்று இனிப்பு சேர்த்துச் செய்யப்படும் இனிப்புகளைத் தாராளமாகச் சாப்பிடலாம் என்று பலரும் நினைத்துக் கொள்கிறார்கள். சர்க்கரையைத் தவிர்க்க வேண்டும் என்பதே அடிப்படை நோக்கம் என்பதால், இனிப்புகளை எவ்வளவு குறைவாகச் சாப்பிடுகிறோமோ அவ்வளவு நல்லது. ஆசைக்காக எப்போதாவது ஒருமுறை சாப்பிடுவதில் தவறில்லை, ஆனால், அதிக அளவில் எடுத்துக்கொள்ளக் கூடாது.
சர்க்கரை இல்லாத இனிப்புகள் ரத்தத்தில் சர்க்கரையின் அளவை உயர்த்தாமல் இருக்கலாம், ஆனால், அவற்றில் சில வகை உடல் எடையை அதிகரிக்கச் செய்யும். எனவே, இதில் கவனமாக இருக்க வேண்டும்.
உங்கள் கேள்விகளை கமென்ட் பகுதியில் பகிர்ந்துகொள்ளுங்கள்; அதற்கான பதில்கள் தினமும் விகடன் இணையதளத்தில் #DoctorVikatan என்ற பெயரில் வெளியாகும்.
from Vikatan Latest news https://ift.tt/AxlLUoJ
0 Comments